Zabalik daude Josefina Arregui Klinikaren Alzheimerrarekiko V. Herri Martxarako izen-emateak

Josefina Arregui Klinikak Alzheimerrarekiko V. Herri Martxaren edizioa egingo du datorren irailaren 20an, Alzheimerrarekiko Nazioarteko Egunaren harira antolatutako jardueren barruan. Egun hori irailaren 21ean ospatzen da.

Horrela, Alzheimerrarekiko Martxa Nafarroan Alzheimerra ikusarazteko kirol-ekitaldirik garrantzitsuena sendotzen ari da. Horrez gain, biztanleen artean kirola eta ohitura osasungarriak sustatu nahi ditu, gaixotasun hori eta beste dementzia batzuk prebenitzeko modurik onenetako bat baita.

Martxan zehar, Altsasuko Iortia plazan, doako hainbat jarduera egingo dira, bai haurrentzat, bai ibilbidean parte hartuko ez duten adinekoentzat. Horrela, kirol-jardueraz gain, Alzheimerraren inguruko jai- eta aisialdi-jardunaldi bihurtuko da.

Jarduerak

Haurrak puzgarriekin eta “Teknologia eta esperientziak partekatuz” belaunaldiarteko proiektuaren adin aurreratuaren simulagailuarekin eta errealitate birtualeko betaurrekoekin entretenitu ahal izango dira. Proiektu horrek Belaunaldiarteko Saria jaso zuen Tomás Belzunegui Sarietan.

Adin aurreratuaren simulagailuaren “jantzia” eta errealitate birtualeko betaurrekoak erabiliz, gazteenek zahartzearekin lotutako zentzumen- eta fisika-mugak bizi ahal izango dituzte.

Jardunaldian, parte hartu nahi duten adineko guztientzako ariketa fisikoko saio irekia egingo da. Jarduera Josefina Arregui Klinikako langileek zuzenduko dute, eta helburua autonomia hobetzea eta mendekotasuna prebenitzea da.

Jarduerak Altsasuko Iortia plazan egingo dira, 10:30ean hasi eta 13:00etan amaituko dira. Jarduera guztiak plazan egingo dira, eta jardunaldia musikaz girotuko da.

Aurten, berrikuntza gisa, Etxarri-Aranazko Erraldoien Konpartsak eta Altsasuko Momotxorroek ere parte hartuko dute jardunaldian, eta hainbat ikuskizun eskainiko dituzte Iortia plazan. Arbizuko Dantza Taldeak ere parte hartuko du, dantza-emanaldiarekin.

Halaber, jardunaldian Felipe Lecearen figura aitortzeko ekitaldia egingo da. Felipe Lecea Felipe Lecea Fundazioaren sortzailea eta Josefina Arregui Klinikaren bultzatzailea izan zen, eta ekitaldia Altsasuko Udalak Iortia Kultur Etxeko zabalguneak haren izena izateko egindako proposamenaren esparruan egingo da.

Modalitateak

Martxa irailaren 20an, igandearekin, egingo da, eta zailtasun txikiko bi ibilbide izango ditu: bata, gutxi gorabehera 4 kilometrokoa, eta bestea, 8 kilometro ingurukoa. Bi modalitateak 10:00etan abiatuko dira Josefina Arregui Klinikatik. Ibilbideek hasierako tarte bat partekatuko dute, eta, ondoren, 8 kilometroak egitea aukeratzen dutenak bereizi egingo dira.

Martxaren hasiera Josefina Arregui Klinikako erabiltzaile eta pazienteen kolektiboak egingo du, baita ekimenean parte hartu nahi duten 65 urtetik gorako pertsonek ere. Talde hori arduratuko da ibilbideko lehen metroak egiteaz, martxari hasiera emanez. Herriko ibilbidearen lehen zatian txaranga bat izango dute lagun.

Helmuga Iortia plazan egongo da, eta, kirol-ekitaldiaren eta aisialdi-jardueren ondoren, salda, txistorra eta gazta izango dituen hamaiketakoa eskainiko da. Jardunaldian musika- eta dantza-ikuskizunak izango dira, Etorkizuna Dantza Taldearen eta Irantzu González Dantza Eskolako ikasleen eskutik. Azken horiek dantza garaikidea erakutsiko dute.

Modalitateetako edozeinetan izena emateko prezioa 10 eurokoa izango da, kamiseta eta dortsala barne. 16 urtetik beherakoentzat izen-ematea doakoa izango da, baina ez du kamiseta barne hartuko. Nahi izanez gero, kamiseta erosi ahal izango da ekarpena egiteko, 10 euroko prezioan. DORTSALA 0ren bidez parte hartzeko aukera ere badago; horri esker, ekimenean lagundu daiteke fisikoki parte hartu gabe.

Zabalik daude web bidezko izen-emateak

Josefina Arregui Klinikaren Alzheimerrarekiko V. Herri Martxan parte hartu nahi duten pertsona guztiek irailaren 4tik irailaren 19ra eman ahal izango dute izena online, webgunearen bidez, eta aurrez aurre ere bai Josefina Arregui Klinikak Altsasun, Iruñean eta Gasteizen dituen egoitzetan. Data horretatik aurrera, interesa duten pertsonek Martxaren egunean bertan eman ahal izango dute izena aurrez aurre, 9:00etatik aurrera, irteera-puntuan.

Dortsalak eta kamisetak martxaren egunean jaso ahal izango dira, 9:00etatik aurrera, Klinikako zelaian.

Parte-hartzaileek, kamisetaz gain, Lacturale, Alzola, Frutas Radvi eta Eroskiren eskutik jasotako produktuen lote bat jasoko dute. Halaber, babesleek emandako hainbat lote eta opariren zozketan parte hartuko dute.

Lankidetza eta babesa

Martxak hainbat boluntarioren lankidetza du, besteak beste, Josefina Arregui Klinikako langileena, herriko pertsonena, Dantzaleku Sakanarena, Altsasuko Mendigoizaleak Mendi Klubarena eta Klinikaren Lagunen Elkartearena. Haien ahalegina ezinbestekoa da ekitaldia gauzatzeko.

Horrez gain, hainbat erakunderen babesa du, besteak beste, Laboral Kutxarena, inguruko bulegoak dituzten gizartearekin eta bertako pertsonekin partekatzeko eta lankidetzan aritzeko balio kooperatiboak lantzen dituen erakundearena. Halaber, honako erakunde eta entitate hauen babesa du: Altsasuko Udala; Lacturale; Eroski; Frutas Radvi; Kate Alde; Quesos Albéniz; Embutidos Arbizu; I. González Dantza Eskola; Etorkizuna Dantza Taldea; Fisio Médica Actual; Aritzalko Jatetxea; Aldakin; Ramos Industrial; Amaya Okindegia; Xume Taberna; Borda Jatetxea; Etxarriko Erraldoi Konpartsa; Josefina Arregui Klinikaren Lagunen Elkartea; Zubeztia Elkartea; Atleet; Inurrieta Bodega y Viñedo; Esquisabel Servicios Navarra; DYA Navarra; Alzola; Eseki SAL Dantzaleku Sakana.