Josefina Arregui Klinikak hitzarmena sinatu du Altsasuko Aita Barandiaran Egoitzaren Patronatuarekin, egoiliarrei terapia okupazional indibidualizatua eskaintzeko. Akordio hau irailaren 1ean jarriko da indarrean eta egoiliarren arreta eta bizi-kalitatea hobetzea du helburu.
Hitzarmenaren bidez, Josefina Arregui Klinikak bere baliabide pertsonalak eta materialak jarriko ditu egoitzaren eskura, astean 12 orduko terapia okupazionala emateko, astelehenetik ostiralera. Zerbitzua egoiliar bakoitzari modu pertsonalizatuan eskainiko zaio, pertsona bakoitzaren beharretara egokitutako tratamendu-plan baten barruan.
Kontratuak abenduaren 31ra arteko hasierako iraupena izango du, gutxi gorabehera 6.500 euroko kostuarekin. Ondoren, egoitzaren patronatuak zerbitzu hau lizitaziora aterako du fisioterapiarekin batera, gehienez bost urterako.
1991n sortu zen Aita Barandiaran Egoitzak 42 plaza ditu gaur egun, horietatik 35 Nafarroako Mendekotasun Agentziarekin itunduak. Hasieran pertsona autonomoak artatzeko sortua izan bazen ere, gaur egun egoiliarren gehiengoak mendekotasun-maila ezberdinak ditu.
Psikogeriatrian erreferentzia den Josefina Arregui Klinikatik —Altsasun, Iruñean eta Gasteizen egoitzak dituenak— azpimarratzen da zerbitzu berri honen garrantzia, egoitzarekin lankidetza sendotzeko eta helburu partekatu bati erantzuteko: adinekoen eta mendekotasuna duten pertsonen arreta integrala hobetzea.
Erburua kalea z/g
948 563 850
info@josefinaarregui.com
Astelehenetik ostiralera: 09:00 – 16:30
