Josefina Arregui Klinikak Vitoria-Gasteizko “Psicología Contigo / Psikologia Gertu” jardunaldietan parte hartuko du

Ángel Gardachal, Josefina Arregui Klinikako zuzendari gerentea, topaketaren inaugurazioan izango da; Klinikako psikologo eta neuropsikologo Laura Morenok, berriz, dementzien prebentzioari eta horiei aurre egiteko moduari buruzko mahai-inguru batean parte hartuko du. Gainera, Klinikak jardunaldiak finantzatzen laguntzen duen erakunde gisa parte hartzen du. Jardunaldiak herritar guztiei irekita egongo dira, doan, edukiera bete arte.

“Psicología Contigo / Psikologia Gertu” jardunaldiak Arabako Psikologia Elkargo Ofizialak antolatu ditu, psikologia herritarrengana hurbiltzeko eta gaur egungo erronka pertsonal, familiar, sozial eta profesional nagusietako batzuei buruz hausnartzeko gune bat sortzeko helburuarekin. Bi egunetan zehar, osasun mentalarekin, nerabezaroarekin, zahartzearekin eta dementziekin, minbiziarekin, suizidioarekin, erakundeetako ongizatearekin, mendekotasun teknologikoekin eta psikologia juridikoarekin lotutako gaiak landuko dira.

Jardunaldia urriaren 16an, ostiralean, 16:00etan hasiko da aurkezpen- eta irekiera-ekitaldiarekin. Bertan Ángel Gardachal izango da Josefina Arregui Klinikaren ordezkari. Programak arratsaldean jarraituko du hainbat hitzaldi eta eztabaida-mahairekin.

Dementziak prebenitzea eta haiei aurre egitea

Josefina Arregui Klinikako profesionalen parte-hartzeak protagonismo berezia izango du urriaren 17an, larunbatean. 10:00etan «Duintasunez zahartzea: dementziak prebenitzea eta haiei aurre egitea» izeneko mahai-ingurua egingo da, eta bertan Laura Moreno, Klinikako psikologo eta neuropsikologoak, parte hartuko du.

Mahai-inguruan dementzien prebentzioa eta haiei aurre egiteko modua hainbat ikuspegitatik landuko dira. Laura Morenorekin batera, AFARABAko ordezkariek, Sandra Inglés neuropsikologoak eta Garazi Beltrán de Guevara psikogerontologoak parte hartuko dute.

Josefina Arregui Klinikak topaketa honetan parte hartzea zahartzearen, narriadura kognitiboaren, Alzheimerraren eta bestelako dementzien inguruko sentsibilizazioarekin, prebentzioarekin eta ezagutzaren dibulgazioarekin duen konpromisoaren barruan kokatzen da, baita pertsonen eta haien familien bizi-kalitatea hobetzen lagunduko duen arreta espezializatua sustatzeko konpromisoaren barruan ere.