Josefina Arregui Klinikak dementzien arloko bere esperientzia partekatu du Zahartzaroa Kongresuan

Erakundearen parte-hartzeak protagonismo berezia izan zuen kongresuarekin batera antolatutako prestakuntza-ikastaroetan. Bertan, Klinikako hainbat profesionalek dementzia eta narriadura kognitiboa duten pertsonen arretarekin lotutako ezagutzak eta esperientziak partekatu zituzten.

Profesionalentzako eta zaintzaileentzako prestakuntza espezializatua

Lehen Mailako Arretako profesionalei zuzendutako “Narriadura kognitiboa eta dementzia. Nola diagnostikatu eta noiz bideratu?” izeneko ikastaroan Javier González neurologian adituak parte hartu zuen. Era berean, Francesc Escabia doktoreak, Josefina Arregui Klinikako zuzendari mediko eta geriatrian adituak, “Dementziei lotutako sintoma psikologiko eta konduktualen ezaugarritzea. Ebaluazioa, diagnostikoa eta tratamendua” saioa eskaini zuen.

Bestalde, Loreto Velilla terapeuta okupazionalak eta Maider Vilariño Erizaintzako Zaintza Osagarrietako Teknikariak (EZOT) irakasle gisa parte hartu zuten zaintzaileei eta laguntzaileei zuzendutako ikastaroan. Ikastaroaren gaia dementziaren sintoma psikologiko eta konduktualen (SPKD) tratamendu ez-farmakologikoa izan zen, dementzia duten pertsonen eguneroko arretan lantzen diren arlo nagusietako bat.

Gainera, Loreto Velillak eta Raquel Guerrerok, Josefina Arregui Klinikako terapeuta okupazional eta musikoterapeutak, sintoma horien tratamendu ez-farmakologikoari buruzko tailer praktiko bat eman zuten. Bertan, eragindako pertsonen eguneroko arretan aplikatu daitezkeen estrategiak eta tresnak aurkeztu zituzten.

Klinikaren presentzia kongresuan Kevin O’Hara Veintimillaren parte-hartzearekin osatu zen. Hura topaketako Batzorde Zientifikoko kide izan zen, jardunaldietan landutako edukiak eta lan-ildoak orientatzeko ardura izan zuen batzordean.

Josefina Arregui Klinikako profesionalek foro espezializatu honetan izandako parte-hartzeak erakusten du erakundeak etengabeko prestakuntzarekin, berrikuntzarekin eta psikogeriatriaren arloko ezagutzaren zabalkundearekin duen konpromisoa, dementzia duten pertsonek eta haien familiek jasotzen duten arreta hobetzen laguntzeko.