Estatutuak

Fundazioa eratzea

1. artikulua.- Fundazioa ongintza eta laguntza arloko Fundazio partikular eta pribatua da.

2. artikulua.- Fundazioak nortasun juridiko independentea du, bai eta bere ondarea ere, eta gaitasun juridiko eta jarduteko gaitasun osoa dauka.

Horren ondorioz, ahalmena izanen du denetariko ondasunak, higiezinak eta eskubideak eskuratu, kontserbatu, eduki, erabili, edozein bidez besterendu eta kargatzeko, eta ahalmena ere era guztietako egintzak eta kontratuak egiteko, transakzioak egiteko eta auzibidera jotzeko, Epaitegi, Auzitegi eta organismo publiko eta pribatuen aurrean denetariko ekintzak eta salbuespenak baliatuta, betiere antolamendu juridikoan ezarritakoari lotuta.

3. artikulua.- Fundazioaren iraupena mugagabea izanen da. Patronatuak, hala ere, Fundazioa iraungitzat jotzen ahalko du, haren xedea ezinezko bihurtzen bada; beraz, likidatu eginen luke eta ondoriozko ondasunei egokitzat jotzen duen erabilera emanen die ongintzaren barnean, betiere sortzaileen borondatearekin ahalik eta antzekoena.

4. artikulua.- Edonola ere, sortzaileak Fundazioa eratzeko ekitaldian adierazitako borondateak arautuko du Fundazioa, eta era berean, Estatutu hauek eta Patronatuak borondate haren interpretazioan edo garapenean askatasunez ezartzen dituen xedapenek ere bai.

5. artikulua.- Fundazioaren helbidea Altsasun kokatu da (Nafarroa), Zelai kalea 84. Patronatuak, dena den, askatasunez erabakitzen ahalko du helbide sozialaren aldaketa Foru Komunitate honen barnean.

Fundazioaren xedea

6. artikulua.- Fundazioak ongintza-izaera izanen du, irabazi-asmorik gabea, hots, dementziak artatu eta tratatzea.

Zentroak ematen dituen zerbitzuak doakoak izanen dira, eta diruz ahulen dabiltzan biztanleria-sektoreek izanen dute lehentasuna.

Salbuespenez, kuota ekonomikoak finkatzen ahalko dira, onuradunei ematen zaien arretagatik, eragiten diren gastuak berdintze aldera.

7. artikulua.– Unean uneko inguruabarrak kontuan harturik, Fundazioak erabateko askatasuna izanen du bere jarduketa bideratzeko Patronatuaren iritziz une historikoarentzako egokienak diren jarduera, xede eta helburuetarantz, betiere hura sortzeko espirituarekin bat badatoz.

8. artikulua.- Fundazioak erabateko askatasuna izanen du bere laguntzen onuradunak aukeratzeko.

Aipatu ahalmena Nafarroako Gobernuko Osasun Departamentuko Sare Orokorrean eskuordetuko da, baldin eta Fundazioaren zerbitzu emankizuna aipatu Departamenduarekin hitzartzen bada.

Patronatuak barne-erregimeneko erregelamendu bat eginen du Fundazioaren zentroaren funtzionamendua eta antolaketa arautzeko.

9. artikulua.- Fundazioaren ongintza-jarduera gauzatze aldera, arreta emanen zaie bere onuradunak diren pertsonei eta Altsasun eraikiko den zentroan barneratu eginen dira, sortzaileak eta beste pertsona batzuek jarduera hornitzeko ematen ahal dituzten ekarpen, dirulaguntza eta laguntzen bidez.

Fundazioaren gobernu-organoak

10. artikulua.- Fundazioaren gobernu-organoa haren Patronatua da.

11. artikulua.- Patronatuko kargu guztiak konfiantzazkoak eta doakoak dira.

Erabat da bateraezina patronukide kargua edo legezko ordezkaria izatea (baita haien ezkontideak ere) entitate barneko edozein postu edo kargu ordaindurekin.

12. artikulua.- Fundazioaren gobernu-organoak erabateko nagusitasunez erabiliko ditu bere ahalmenak, trabarik eta mugarik gabe, eta haren egintzak behin betikoak eta apelaezinak izanen dira, betiere legeek ezarritako ahalmenak alde batera utzi gabe.

Horren ondorioz, denetariko ebazpenak edo akordioak hartzean, ezin izanen zaie bestelako betebeharrik ezarri, salbu Estatutu hauetan espresuki xedatutakoak edota antolamendu juridikoak ezarritakoak.

13. artikulua.- Patronatua Fundazioaren organo gorena da eta, gutxienez, lau kidek osatuko dute. Lehen Patronatua sortzaileak izendatuko du; gero, hurrenez hurren, Patronatuak berak, kideen gehiengoak erabakita, bere kideak berritzen ahalko ditu, edota heriotzak, ezintasunak, uko egiteak edo kargugabetzeak eragindako kargu hutsak bete eta kide berriak izendatu.

Patronatuko karguaren iraupena mugagabea izanen da.

Patronatuak Presidente bat aukeratuko du bere kideen artean, eta halaber, hura ordezkatuko duen presidenteorde bat, presidenteak bertarazterik ez duenean, eta Idazkari bat ere bai.

Sortzailearen Presidente kargua biziartekoa izanen da.

Altsasuko Alkate kargua duen pertsona Patronatuko berezko kidea izanen da edo, bestela, aipatu herriko Udalak izendatutako Zinegotzia. Kide horrek bere kargua beteko du Udalkide den bitartean.

14. artikulua.- Patronatua bilduko da Presidenteak egokitzat jotzen duen bakoitzean, eta gutxienez, hilean behin edota kideen herenak eskatzen duenean, aurrez Idazkariak deiturik, betiere gutxienez bilera eguna baino hamabost egun lehenago.

15. artikulua.- Patronatuaren lehen deialdian, eraketa baliozkoa izanen da, kideen erdiak baino bat gehiago daudenean, eta bigarren deialdian, bertaratu den kide kopurua edozein izanik ere.

Erabakiak botoen gehiengoz hartuko dira. Berdinketak Presidentearen kalitateko botoak erabakiko ditu.

Salbuespenez, Fundazioaren iraungitzeari buruzko edo Estatutuen aldaketari buruzko akordioa hartzeko, bertaratze eta bozketa quorumak beharko dira, hots, bi kasuetan, gutxienez kideen bi herenek egon beharko dute.

Akordioak Akten Liburuan transkribatuko dira, eta Aktak Presidentearen eta Idazkariaren sinadurekin baimenduko dira.

16. artikulua.- Patronatuak Fundazioaren goi-gobernu, administrazio eta ordezkaritzari dagokion orotan izanen du eskumena eta, bereziki, kontuotan:

1. l) Sortzailearen borondatea betetzen dela zaintzea, eta beharrezkoa bada, borondatea interpretatu eta garatzea.

• Fundazioaren estatutuak aldatzea, hori beharrezkoa bada, sortzailearen borondatea hobeki betetzeko.
• Fundazioaren goi-ikuskaritzaz, zaintzaz eta orientazioaz arduratzea.
• Aldizkako jarduketa-programak onestea.
• Fundazioaren helbidea aldatzea.
• Ildo orokorrak finkatzea, Fundazioaren xedeetan eskura dauden diruen banaketaz eta aplikazioaz.
• Fundazioaren kapitalaren inbertsioak baimentzea.

8) Kontularitza-erregimen egoki bat eramatea lortu nahi diren xedeei begira

• Onestea urteko Balantzea, Fundazioaren jarduerei buruzko txostena eta urteko Kontuak.
• Fundazioa iraungitzat jotzea, haren helburuak ezin bete badira eta ondoriozko ondasunei zer ongintza-erabilera eman erabakitzea.

Fundazioaren ondarea eta araubide ekonomikoa

17. artikulua.- Fundazioaren ondarea denetariko ondasunez eta eskubidez osatua egoten ahal da, eta antolamendu juridikoak ezartzen dituen mugak izanen dira muga bakarrak.

18. artikulua.- Fundazioaren kapitalaren osagaiak:

hasierako ekarpena eskudirutan: 500.000 pezeta

1. Bere ondasunen errenta likidoak.
2. Ondoren eskuratzen dituen ondasunak eta higiezinak.
3. Eskuratzen ahal duen balio-zorroaren errendimenduak.
4. Jasotzen ahal dituen dohaintzak eta dirulaguntzak.
5. Antolamendu juridikoarekin bat eskuratu daitezkeen beste edozein ondasun edo eskubide.

19. artikulua.- Ulertuko da Fundazioaren ondasunak eta errentak lotuak eta atxikiak direla, zuzenean eta berehala, Fundazioa sortzeko xedeak lortzeko, eta ez da tartekatuko pertsonarik edo agintaririk batere.

Ondasun eta errenta horien erdia baino gehiago entitatearen xedeak betetzera bideratuko dira Nafarroa barruan edota izaera zibil hori duten pertsonen faboretan.

20. artikulua.- Abagune ekonomikoak aholkatzen duenaren arabera, Fundazioak beharrezkotzat edo komenigarritzat jotzen dituen aldaketak, bihurketak eta eraldaketak egiten ahalko ditu uneoro eta behar adina aldiz Fundazioaren kapitalaren inbertsioetan, kapital horren egiazko balioa ez murrizteko, balio nominalari eutsita ere.

21. artikulua.- Fundazioaren zorroa osatzen duten balore-tituluak jaulkitzen dituzten sozietateek beren kapital soziala handitzen dutenean, akziodunei lehentasunezko harpidetza-eskubideak esleituta, Fundazioak gehikuntza hori adierazten duten akzioak harpidetu ahal izanen ditu edo harpidetza-eskubideak saldu ahal izanen ditu.

Nolanahi ere, kapital-gehikuntzetan parte hartu ahal izanen du, nahiz eta sozietate jaulkitzaileak salbuespenez ondare-ekarpen osagarriren bat eska dezakeen.

Fundazioaren kapitala osatzen duten sozietateetako batek edo batzuek, edozein eratan, bat egiten badute, eragiketa horien ondorioz jasotzen dituzten balio-tituluak Fundazioaren kapitalaren zati osotzat hartuko dira.

22. artikulua.- Fundazioaren ondarea osatzen duten ondasun eta eskubideen kontserbazioa ziurtatzeko, kasuan kasuko erregistroetan inskribatuko dira, eta balioak eta eskudirua banku-establezimenduetan gordailutuko dira.

23. artikulua.- Urtero, diru-sarreren eta gastuen aurrekontu bat osatuko da hurrengo ekitaldirako. Diru-sarreretan sartuko da Fundazioaren ondasunek sortuko dituzten errendimendu guztien zerrenda eta, gastuetan, urtealdian egin beharko diren gastuen aurreikuspena. Aurrekontuaren ekitaldian, beharrezkotzat jotzen diren aldaketak egiten ahalko dira aurrekontuan, beharretara eta bete beharreko arretetara egokitze aldera.

Era berean, ekitaldi bakoitzaren bukaeran, egoera-orri bat eratuko da,  kasuan kasuko aurrekontua aplikatzearen emaitzak adierazteko.

Fundazioaren aldaketa eta iraungipena

24. artikulua.- Estatutu hauek Patronatu Kontseiluaren erabakiz aldatzen ahalko dira, sortzailearen borondatearen espiritua interpretatuta.

25. artikulua.- Edozein inguruabarrek eraginik, Fundazioaren xedeak betetzea ezinezkoa bada, Patronatu Kontseiluak Fundazioa desegintzat joko du eta komenigarrien jotzen duen ongintza-erabilera emanen die Fundazioaren ondasunei, sortzailearen nahia eta borondatea interpretatuta.

Iruñea, 1993ko martxoaren 8a